有日一位小姐好大力推開診所門，衝埋嚟登記處…
佢氣都喘埋問：「positive係有呀？係咪你send嚟呀？」
我一頭霧水：「小姐你問緊啲咩呀？我冇send過嘢俾你呀」
佢：「唔係你send嚟俾我男朋友㗎咩？唔係佢嚟過診所驗過啲咩嘢咩？」
我：「你問返你嘅男朋友啦，我哋唔會答任何私隱嘢」
佢：「positive喎？即係有呀？」
我：「小姐我真係唔知你問緊啲咩，我亦唔可以答你啲咩，你有咩就去問返你男朋友啦」
佢指住電話：「有人send句positive去佢whatsapp度㗎喎，唔係診所send嘅仲有邊個會send呀？」
呢個時候佢手上嘅電話響起，佢好慌張咁塞部電話埋嚟：「你聽你聽你聽，你話部電話係你拎係你拎」
痴線。
我是拒絕的，我冇理佢。
佢將部電話擺喺枱面，部電話一路響佢就一路跳一路講：「點算點算」
電話停咗響，佢就唔跳，再同我講：「你見到頭先個情況有幾緊急㗎啦，我唔可以喺度咁耐㗎，佢之前有講過要去診所睇醫生㗎，你睇返佢個紀錄咪知囉」
咁你快啲返火星啦，地球真係好危險㗎。
我：「真係唔好意思啦小姐，我真係唔可以答你關於其他人嘅嘢，你想知嘅問返佢本人啦」
電話又響，佢又跳，喂，好過癮喎。
我喺度欣賞佢跳舞，電話響完佢又跳完又再問：「BE係驗啲咩呀？係邊種病呀？」
我：「BE？」
佢：「係呀大楷B大楷E」
BE…positive…應該係，除非唔係。
我：「印象中我哋係冇呢個項目驗嘅，會唔會句英文係另一個意思呢？」
佢：「positive呀嘛，即係有啦，仲可以有咩意思呀」
我：「你都係去問返佢本人啦」
電話又響，佢又跳：「點算點算又打嚟」
佢急燥望住我問：「真係唔係你send嚟？」
我眼神堅定：「真係唔係我」
佢：「知唔知呢頭仲有邊間診所？」
我眼神堅定：「唔知」
佢：「我自己搵」
我眼神堅定：「嗯」
佢彈住咁離開咗診所。
Search